文章分享
新聞

胡琳下月開騷 搵Sunny幫拖跳勁舞



入行11年的胡琳(Bianca),將於下月26及27日舉行兩場個唱,闊別演唱會舞台三年,今次踏上台板大玩新意,邀請香港「舞王」Sunny Wong排舞,「好多記者朋友都問我,跳舞係咪今次最大挑戰,其實我讀書時學過跳舞,只不過生疏咗。」

雖然個唱最貴門票索價1,180元,胡琳指屆時觀眾定必覺得物有所值︰「除咗成隊Jazz Band由紐約飛嚟香港做騷,VIP門票有得睇綵排、簽名會,一張飛玩足成日!」雖然她講明未必會性感上陣,但保證樂迷有高質的視聽享受︰「性感唔代表滿足所有人,揀衫都係配合番歌曲同舞步,費事到時手腳唔協調,搞出大頭佛!」

恨有自己金曲

胡琳因翻唱經典金曲獲讚靚聲,但她坦言苦樂參半。「唱人哋金曲,好處係樂迷會留意自己聲綫同唱歌技巧;但其實我一直有做自己嘅歌,好期待做到一首大家認同嘅金曲,到時有後輩歌手翻唱我嘅作品,咁先係真正嘅成功。」

訪問期間,談到黎明(Leon)將作人父,原來胡琳一直視Leon為偶像,屆時更唱對方的金曲致敬。「之前出翻唱碟時,都唱過好多佢嘅歌,好似《Oh!夜》、《那有一天不想你》咁,到時演唱會都會唱。」