文章分享
新聞

【出道12年】阿媽狂踩老竇偷撐 胡琳試過年幾冇收入



好多時追夢,除咗要堅持同毅力,亦唔少得金錢同屋企人「十卜」。

38歲嘅胡琳06年樂壇出道,當年26歲嘅佢由紐約學音樂返港,充滿憧憬賣聲,新人蜜月期過後,發展一度停步,幸得家人金錢支持才沒有放棄,今日仍然可以留低。

「出道兩年,發展慢咗,確實中間有段時間係搵唔到食,有諗過放棄,遇到好多挫折,幸運有家人支持。」歌手表面風光,背後辛酸,胡琳日前喺北角接受《蘋果》專訪時回想:「年幾冇收入,我要攤大手板問父母,作為一個成年人,要畀屋租同開支,我又長期keep住冇積蓄。」

其後胡琳工作量多番,佢有咗埋理財觀念先冇咁徬徨:「喺呢度唔係可以吸空氣就得到溫飽,出街就要使錢,我決心努力工作,唔想再令屋企人擔心,好彩我係冇家庭負擔。」胡琳係家中獨女,佢爆料媽咪曾極力反對佢當歌手:「我未出道,媽咪已咁講,『算啦,你靚又唔夠人靚,高又唔夠人哋高,你憑乜嘢?』佢用好多唔同方法打擊我,仲話唔知我唱乜,軟硬試過晒,仲叫我退出。」每個家庭都有虎媽貓爸,胡家都唔外,「媽咪奈我唔何,嗰段時間同媽咪關係差,爸爸由細到大同我一group,佢暗地裏支持我,佢會拍膊頭支持我,佢話:『唔知自己最想做咩,至少你知自己想做、同鍾意做乜嘢,唔使諗咁多』,平時好少出聲嘅爸爸鼓勵。」父母一個好人,一個醜人。胡琳話:「佢哋唔使我養,我冇經濟負擔,唔使畀家用,我成日船到橋頭自然直,不過我都有孝順佢哋。」 胡琳相信堅毅耐力,純因天賦異禀僅七秒記憶:「我相信內心深處,即使發生過咩大件事,我發洩完又冇嘢,一年半載後,人哋講番,我都唔記得。」胡琳呢個記憶功能仲會自動調教,佢話:「人哋對我好,我會成世記得。」

開過四次音樂會嘅胡琳,將於52627日喺九龍灣國際展貿中心Star Hall演出兩場,為咗呢次演出,胡琳今次向郭富城御用排舞老師Sunny Wong學藝。直擊佢第一堂,師徒合拍,胡琳賣口乖:「Sunny肯幫,我肯定冇問題。」胡琳擔心記憶力弱,忘記舞步,Sunny搞笑鼓勵:「如果你係金魚記憶,我餵你十條金魚就實記得。」Sunny讚胡琳首堂表現有80分:「跟到我舞步,我都跳到濕晒。」胡琳聽後自嘲:「咁我有信心啦,有個好老師,真係蕃薯都變黃金。」講到演唱會賣點,胡琳話:「希望視覺除有新鮮嘢畀大家睇,最重要係音樂,樂迷入場可以感受到。」