文章分享
新聞

【星二代放暑假(11)】歐陽妙芝細仔兩歲做郭富城師弟 節瓜仔隨時變肌肉人



[蘋果日報] 名模歐陽妙芝嘅9歲細仔方玉亨(Atilla),2歲開始學跳舞,啟蒙老師係郭富城御用排舞師黃國榮(Sunny),Atilla習「舞」7年練得好身手。Atilla平日課餘都一直有學習,暑假多咗時間,一周增至上三堂,合共3.5小時,越跳越起勁。

 

妙芝少女時代熱愛跳芭蕾舞,舞功竟遺傳咗畀細仔,佢自幼聽到音樂就聞歌起舞,身體跟住節奏擺動,從前圓嘟嘟身形,跳舞後減磅,肌肉都變結實。Atilla日前到銅鑼灣跟Sunny上堂,妙芝同行享親子樂,三人先熱身鬆筋,Sunny先着Atilla複習上堂學習過嘅舞步,隨即再教新舞步,妙芝母子跟住學習。

 

練習咗三、四次,Atilla已完全熟練,仲放膽獨自Solo,Atilla跳得唔錯,但自嫌未夠好,自評得7分。Sunny卻畀10分滿分:「3分送畀佢,因為Atilla擺咗自己style入去,佢十分勤力、十分可愛、十分努力同十分enjoy。佢每次跳完都會同我分享吓,主動活潑,對自己有要求,佢同我一樣天蠍座,全心全意投入做好一件事,有熱誠用盡方法做到完美。」

 

Sunny大讚Atilla有才華,去年舞蹈學校大滙演,表現突出嘅Atilla更獲安排站舞台中間演出,Sunny話:「我教學生跳舞,鼓勵佢哋學咗老師舞步,吸收咗技巧同style,模彷跳出嚟時,不妨再滲入自己風格,呢啲就係學以致用。Atilla做得到,佢有時會返屋企,自創咗舞步,排好拍片畀我睇,仲會唱埋歌,佢好有節奏感。」

 

Atilla熱身拉筋時,可以做企立一字馬,輕易將腿放喺頭上,Sunny話:「佢條筋好鬆,係天生咁鬆,點壓都鬆。」講到小朋友學跳舞,Sunny認為3歲較適齡:「太細個會唔夠集中,大啲嚟學,佢哋會想望住你,學你教嘅動作。我建議家長可以畀小朋友試多啲唔同舞蹈,等佢哋揀吓鍾意嘅舞步,跳舞運動量好大,佢哋跳完返屋企會好乖,因為放晒電出嚟。」

 

Atilla直認係狂舞派:「我覺得跳舞好玩,可以表達自己感受,但呢種運動又冇其他運動咁辛苦,家暑假,我上多啲,一周三堂,總共3.5小時。跳舞都幫我減肥,跳完好開心,好似釋放咗煩惱咁。」Atilla記性好,排舞話咁快就記得,佢自爆試過跳舞考試一時緊張亂陣腳:「我繼續跳落去,保持平靜。」妙芝表示Atilla志願係做一個表演者:「佢睇騷仲會研究埋人哋舞台設計、燈光。」妙芝鼓勵囝囝追夢,會全力栽培,佢話:「囝囝跳舞瘦咗,肌肉結實咗,佢會呻運動完肌肉痠痛,我話咁就有用,證明你冇偷懶。」