文章分享
新聞

薛家燕媽媽又有新節目 一星期對足6日:真係忙到想暈!



[香港01] 薛家燕,胡琳和排舞師Sunny Wong為嚟緊星期日在TVB播出的新節目《香港情·香港味》宣傳,節目播出時間係晚上七點半,咦?咁咪同家燕姐主持,八點半播嘅《流行經典50年》時間好接近?未算啊,八月底家燕姐主演的電視劇《燦爛的外母》亦會出街,加埋午夜一點重播半個鐘的《皆大歡喜》,如果你是家燕姐忠實粉絲,追足咁多個節目,一個星期就可見家燕姐六日喇!連家燕姐自己都笑言:「成日都會見到我!我真係好忙,頭先差啲想暈。」嚇到旁邊的胡琳要即刻扶住家燕姐啊!

家燕姐話暈是純粹搞笑,不過見暈真係可大可小,家燕姐囡囡石祐珊亦因為過勞見暈入院:「嚇親我,佢仲驚我擔心冇同我講,依家有成日whatapps佢,佢就話冇事喇,佢聽日都飛馬來西亞,應該冇事喇依家。」

雖然日日都在電視機見到家燕姐可能會有啲厭,不過每一個節目家燕姐都用全新嘅面貌見大家,好似《香港情·香港味》佢將會帶大家認識在香港創業嘅追夢者,她表示:「都係飲食居多,有啲地道嘅,有啲係創意嘅,耐何有好多機制同財務關係,佢哋未必能夠完成理想,理想集團就會喺屯門有個地方專做美食,對追夢者支持,開始時好多嘢免費畀佢哋,包括租金。」

家燕姐仲話搞到自己都心郁郁想創業,搞返知家燕媽媽餅,講到明要用自己個樣做嘜頭:「我個嘜頭都值錢㗎,人㗎搵我代言都要付筆錢㗎,同埋好地道。」